عيد الاضحى المبارك خلاص على الابواب

كل سنة وكلنا طيبين وبخير وعيد سعيد علينا جميعا وعلى كل حبايبنا

من زمااااان وفيه عادات وتقاليد مرتبطة بالأعياد يعني احنا في مصر بنسمي عيد الفطر او العيد الصغير بعيد الكحك لان كل الناس بتشتري كحك وبسكوت وشوكولاتات وكل البيوت بتبقي مليانة حاجات من دي بتخلينا طالعين من العيد واحنا زايدين بتاع اتنين تلاتة كيلو في وزننا من كمية الكالوريز اللي اخدناها مع الكحك والبسكويت والترمس والفول السوداني

نيجي بقى لعيد الأضحى او العيد الكبير او عيد اللحمة او عيد الفتة لأن الفتة والممبار بيكونوا الراعي الرسمي لكل البيوت المصرية اول يوم العيد تحس كده ان فيه اتفاق بين كل الامهات انهم يطبخوا فتة ولحمة اول يوم

بس في عادات أغرب بنشوفها هنا في مصر زي الناس اللي بتلطخ ايدها بدم الاضحية وتطبع كف علي حيطة بيتها او عربيتها معتقدين ان ده بيمنعهم من الحسد او بيشيل العين

 في دول تانية زي المغرب نلاقيهم بيقصوا الصوف بتاعه

وبيحطوله كحل !!!  اه والله كحل انت قرأتها صح ليه بقي ؟!  لانهم بيقولوا ان الخروف ده بيحمل صاحبه للجنة فلازم يكون علي اكمل وجه من الزينة

في حين دولة تانية زي الجزائر نلاقيهم بيعملوا يوم الوقفة مصارعة بين الخرفان وبيحضرها عدد كبير من الناس ويشوفوا مين اللي هيكسب ويبقي ده الخروف الفائز سيد الخرفان مع العلم ان المصارعات دي ممكن تصيب الاضحية بضرر او جرح ومن شروط الاضحية انها تكون سليمة

انا كده كلمتكم عن بعض العادات الغريبة اللي مرتبطة بالعيد في مصر وغيرها من الدول

مستني مشاركاتكم وتحكولي عن اغرب العادات اللي بتشوفوها في العيد وندردش مع بعض فيها